Arquitectura popular
Actividades iniciais:
A partir das reflexións feitas na aula, deixa un comentario respondendo á pregunta do título: En cal destas vilas che gustaría vivir?. Razoa brevemente a túa resposta.
Ver o mapa máis grande
Sobre o mapa están sinalizados os edificios previamente estudados. Se facedes clic sobre as marcas, comprobaredes que hai moitos aos que lles falta a imaxe. Esas imaxes completarémolas despois da nosa visita coas que vós fagades. Como mínimo, cada grupo debe de fotografar o edificio ou edificios asignados. Procurade recoller aqueles detalles da construción que sexan especialmente significativos ou que vos chamen a atención.
Visita ao Castelo de San Filipe
Os seus antecedentes históricos remóntanse ao século XVI.
Situado na bocana da ría de Ferrol, fronte ao castelo da Palma, formaba parte dun conxunto de fortificacións capaces de impedir a entrada na ría das flotas inimigas.
Os castelos de San Filipe, A Palma e San Martiño formaban un perigoso e insuperable triángulo de fogo e permitían ademais a colocación dunha cadea tendida entre o castelo de S. Filipe e de S. Martiño que chegado o caso podía facer naufragar as embarcacións que se internasen na ría.
San Filipe sufriu importantes reformas no século XVIII pensadas para rexeitar máis eficazmente non só os ataques por mar senón tamén os ataques por terra.
Percorrido polo barrio da Madalena.
Partindo da Praza de Amboaxe, onde orientaremos o noso plano, iniciaremos, por grupos, a visita do Ferrol racionalista.
Percorreremos as rúas principais, Real, Dolores, María, Sol e Madalena, comprobando así o seu trazado ortogonal.
Cada grupo dirixirase despois aos enderezos onde se localizan os edificios modernistas de Rodolfo Ucha que levamos estudados para contemplar e fotografar os seus alzados, os detalles ornamentais propios do modernismo (elementos vexetais e florais, galerías de madeira envidradas, decoracións xeométricas, rostros de muller…) e o uso dos novos materiais construtivos como o cemento, o ferro e o cristal.
Remataremos o paseo na Praza de Armas que xunto coa de Amboaxe ocupan os extremos laterais da cuadrícula regular que supón este barrio da Madalena.
Evolución da cidade de Ferrol.
Arquitectura popular
Actividades iniciais:
Indica nos comentarios a esta entrada cal destas catro casas é a que máis che gusta.
No ánimo de contribuír a que os cidadáns perciban a arquitectura e o territorio como piares básicos da nosa cultura, en xaneiro de 2000 o Colexio Oficial de Arquitectos de Galicia puxo en marcha o que posiblemente sexa o seu máis ambicioso proxecto cultural: o proxectoterra. Partindo do convencemento de que este obxectivo nunca se logrará acadar se non conseguimos que o feito arquitectónico e territorial adquira unha sólida presenza no ámbito da educación, o proxectoterra é un proxecto de intervención educativa dirixido ás distintas etapas da Educación Obrigatoria co fin de contribuír a mellorar o coñecemento que os escolares de Galicia deben ter da nosa arquitectura e da nosa identidade territorial. Esta é a aportación que o noso colectivo e as entidades colaboradoras no proxecto poñen a disposición da comunidade educativa esperando que sexa un instrumento que axude a acadar os obxectivos que sobre arquitectura e territorio xa se contemplan na actualidade nas distintas etapas da Educación Obrigatoria.
